“Aquí Galicia” ten como escenario a localidade pontevedresa de Gondomar, que celebra a súa Festa da Rosquilla. O programa aproveita a viaxe para visitar os diferentes atractivos do lugar, como o pazo do Conde, que fai que sexa coñecida como vila condal. En Gondomar acaban de celebrar a II Gala do Deporte. Con este motivo, as cámaras do programa asisten aos adestramentos dos equipos de patinaxe artística, de fútbol gaélico e de tenis. Tamén entra nos obradoiros do ceramista Antón Román, o tecedor Albino Quinteiro, quen posúe o tear máis grande de España, e o artesán Anxo Prada, que planta e pinta cabazas. Ademais, “Aquí Galicia” faise eco da iniciativa dunhas emprendedoras locais, que consiste en estampar vestidos e traxes con herbas e flores recollidas na zona. Poñen a música a orquestra Suavecito, o grupo de baile tradicional e de gaitas do Centro Cultural A Merced de Chaín, a academia de danza moderna LDanzia e o grupo de música tradicional Os Terribles de Donas.
