O programa da Televisión de Galicia “Vaia Troula”, presentado por Nieves Rodríguez, achégase esta semana ata A Guarda, onde se realiza o espectacular desfile folclórico tradicional e das bandas mariñeiras. Pola súa banda, a reporteira Belén Vara achegarase a localidade luguesa de Mondoñedo para vivir en primeira persoa unha das mellores festas medievais de Galicia. Ariadna Leis visitará Pontevedra, onde se celebran as Festas da Peregrina, a festividade máis importante da cidade do Lérez. Ademais, María Blanco irá a Cervo, onde se celebra a Maruxaina. O equipo de “Vaia Troula” tamén estará na festa do emigrante de Vila de Cruces, na Virxe das Dores de Covelo, nas festas de Agolada e na exaltación da ameixa de Carril, en Vilagarcía de Arousa. A festa da prehistoria de Mos, a romaría campestre de Neixón-Cespón de Boiro e a festa mexicana de Avión completan o menú trouleiro do programa.
