Sen a música resultaría difícil entender a historia de Galicia. No transcurso dos séculos, coas sucesivas migracións e invasións, fóronnos chegando influencias musicais de toda Europa. A gaita, símbolo por excelencia da música tradicional galega suponse que a traen os suevos no século V. Posteriormente, o Camiño de Santiago, que atraía xente de toda Europa, supuxo a posibilidade dun magnífico intercambio musical desde a Idade Media.
Na actualidade a nosa música goza de boa saúde. Temos un estimable número de bandas e orquestras sinfónicas e uns grandes creadores e intérpretes de folk, pop e rock que crece ó amparo dunha industria autóctona que non deixa de evolucionar. Neste programa, pese ó amplo do tema, imos coñecer o que foi e o que é na actualidade a música galega.
