A Televisión de Galicia emite esta noite un programa especial de “No Bico un Cantar”, en que se trazará un mapa de Galicia. Este mapa non indicará montañas, ríos, costas ou estradas porque será un mapa de emocións: o trazado farase a través desas cancións que falan de lugares e que nalgúns casos chegan a converterse en himnos. Non hai nada que faga sentir con máis intensidade o amor á terra que partir. Así é a emoción dos emigrantes, que escoitan con bágoas nos ollos as cancións que fan referencia á súas vilas natais na distancia.
