Orgullosa das súas orixes, Carmiña Vila naceu nunha familia que nunca soñaría con mandar os fillos á universidade se non fose por unha mestra que cambiou o rumbo da vida desta muller. Con ela, os espectadores da TVG coñecerán o día a día dunha profesora feliz, con paixón polo seu traballo e polas bibliotecas escolares. Xosé Carlos, pola súa banda, falaralle ao programa da súa grande paixón: o folclore galego. Este profesional acostumado a viaxar visitando grandes hospitais e centros médicos foi presidente do centenario coro Cántigas da Terra durante 15 anos.