No presente episodio de "Casa Manola", Fanny recibe a visita de
Alicia, interpretada por Silbana C. Sestelo, unha misteriosa rapaza
que polo visto era moi amiga súa no instituto, pero á que non lembra
de nada. Ao tempo que Fanny trata de facer memoria sen que Alicia se
decate do seu esquecemento, a rapaza pon en marcha un sinistro plan de
vinganza.
Outro que quere arranxar contas co seu pasado é Nacho, pois, grazas á
terapia que está levando a cabo, descubriu que a súa nai lle causou un
trauma ao rifarlle por mexar na cama cando era neno.
Pola súa parte, Cabanés adáptase aos novos tempos e decide poñer en
marcha un negocio con moito futuro: o alugueiro de caixeiros
automáticos. O gastrobar de Vero será o lugar elixido para poñer en
marcha esta estafa.