Turón vio nacer nel añu 2002 una banda mui especial de nome Losone, qu’en toos estos años foi iguando y perfilando adulces la so propuesta sonora, que nun quier pertenecer a un movimientu musical definíu, pero tampoco refugar los soníos que-y valieron d’inspiración. D’esta manera, pente la música d’esta formación, podemos acolumbrar influencies del hard rock, el noise, el rock sicodélicu, el pop, el trip-hop, el grunge o mesmamente la clásica.