Os cociñeiros en ruta de Gastrópodos chegan á vila lucense de Portomarín, á beira do encoro de Belesar. Desta volta, o obxectivo do programa é falar dun animal moi presente na vida gastronómica do lugar: a anguía.  Este peixe, que noutrora era abundante nas ribeiras do Miño ao seu paso por Portomarín, foi minguando na súa importancia debido á construción dos encoros. Aínda así, a presentadora do espazo culinario máis itinerante da Televisión de Galicia, Marta Doviro, sae pola vila adiante na procura dun cociñeiro que lle faga fronte á chef residente do programa, a estrela Michelín Beatriz Sotelo.  Neste episodio, danse a coñecer cuestións relativas á pesca tradicional da anguía no río Miño, das famosas tortas de Ancano e da augardente de Portomarín. O rival escollido para Beatriz Sotelo é o xefe de cociña da Pousada de Portomarín, Antonio Busto.