Os nenos son os protagonistas das dez edicións especiais de “Coma un Allo”, que se ofrecen ata a véspera do Día de Reis. Presentado por Bernardo Montaña, este concurso baseado na dinámica de preguntas e respostas adapta o seu formato con contidos axustados aos coñecementos dos rapaces. En cada programa, tres nenos ou nenas, con idades comprendidas entre 9 e 10 anos, enfróntanse a preguntas das materias que están a estudar nos colexios. Procedentes de Baio, Abadín, Ourense ou Santiago, entre outras localidades, os gañadores e gañadoras optan a variados premios como tabletas, cascos, bolsas ou estoxos do Xabarín. Para estas edicións especiais, os concursantes contan co asesoramento de dous colaboradores: o actor Axel Fernández e a compostelá Paloma Fernández-Olivares Pintos, finalista dun coñecido concurso televisivo.