Barro é desta volta o escenario de Aquí Galicia. Neste municipio, atravesado polo Camiño Portugués de Santiago, o equipo visita a zona de Santo Amaro e o albergue de peregrinos. Ademais, lévanos a percorrer paisaxes coma os montes Ocival, Castrove e da Chan, e mais o río Barrosa, que conserva uns muíños antigos.  Barro celebra a súa primeira Raxofesta e podemos coñecer cinco xeitos de cociñar esta carne: con patacas fritidas, á pementa, ao allo, espetada e en empanada. Para a sobremesa, a proposta é larpeira de bolo de ovo. No apartado musical, “Aquí Galicia” conta coa orquestra La Ocaband, o grupo de danzas folclóricas Amor Ruibal e a banda de música xuvenil de Barro, a academia de bailes de salón BTroula, de Meis, e a orquestra Marbella, de Pontevedra. Os convidados especiais son os actores e actrices da serie “Dalia, a modista”, protagonizada por María Mera e que a Televisión de Galicia está para estrear.